派對之死(The Death of A Party)

陳楸帆

編按:本文以粵語行文,個別粗俗用語僅為營造文學表達效果。

今日炳叔俾咗我一本又殘又舊嘅「雜誌」,作為上次B仔成人禮時沒將佢嘅小士多反轉至「仆街」的獎賞。佢話呢本嘢好珍貴,因為是紙造的,宜家沒有人會印紙書,因為森林啲樹木就快要死到淨曬,所以宜家天氣好鬼差,周不時會有大沙暴,或者大水災,然後我啲成班友仔就會坐著舢舨,由中銀廿八層蕩去太平山歎早茶。

果本嘢寫著「LIME」窩,我問炳叔係點咁解,佢話係「酸橙」咁解,我又問「酸橙」係乜來嘎,佢又阿芝阿咗講唔出啵,我就笑佢好鬼贛居。

炳叔的士多連接喺中銀B座二十二樓背面,似足一隻海南龜果款,在赤紅色的海水中浮下浮下,黏滿灰白色的藤壺貝殼。呢度真係尺水尺金,因此炳叔除咗做正常的士多生意,仲兼職炒埋一啲好鬼得意嘅古董嘢,譬如話某個死鬼咗成百幾年嘅女明星海報、二○二二年版嘅八達通卡(佢話有一種叫做「地鐵」 嘅嘢可以係地底下行駛,而且每次可以坐成幾百人,真係鬼就信)、捻落去會「咕咕」叫的黃色橡皮鴨,總之,一些奇形怪狀但又講不出實際用處嘅嘢。

佢賣到好貴,但仍然有好多老人家來幫襯,甚至,流著眼淚離開,好似執到寶咁。

我翻住本雜誌,嘩,真~係~好鬼難明,我話果啲字我都唔識,只好睇住啲花花綠綠嘅圖畫,都係好難明。炳叔指著書,講俾我聽,呢本嘢主要係講,上個世紀六七十年代啲人,係點樣想像未來,然後睇未來究竟係咪同佢地諗嘅一樣。我都唔係好明「想像」嘅意思,炳叔話,就係去諗一啲未發生到嘅事情。

但係,既然都未發生到,又點去諗啫。

我問炳叔,咁究竟佢地「想像」到啲嘢有冇發生到。炳叔「fing」頭,指住幾張好鬼燦眼嘅圖片,上面有月球上面嘅棚屋,有飛係半空嘅Taxi,有靚到爆嘅半機械女仔,總之,七彩到爆炸。佢話,係二○四二年,呢啲都冇發生到。

咁即係點啫。我都是唔係好明,點解炳叔要俾我呢本老嘢。

我們果陣時好中意開Party嘅。炳叔好似有啲矇矇地,老眼閃著光,似見到鬼咁望著半空。一個禮拜有七日,我地有三日都喺Party度,喺Pub,喺朋友屋企,喺廣場,喺公園,喺海邊嘅沙灘度,我地成班後生,飲開啤酒、洋酒、雞尾酒,成晚咁跳舞、猜枚、吹水、睇戲,男男女女,講住自己嘅過去、現在,諗住以後,幾年之後,幾十年之後,會係點。大家都好興奮,好似都見到果陣時嘅自己,好鬼識諗,好鬼中意講嘢。然後天光曬,各人返屋企,返工,返學,好似機器人咁,都唔知慘字點寫。

炳叔篤住本雜誌,話,果陣時就係咁。人人都係中意派對嘅動物,就算對社會有不滿,都會去諗住以後,科學會幾昌明,社會會幾發達:Cancer唔使死、居者有其屋、民主自由、人人有書讀、有飯食、有拖拍。人人都會想去見到聽日嘅太陽。

我「Fing」住頭,表示無法理解。我淨係識諗住今日食乜,周街去蒲。

仲有一啲人係以想像未來為生,佢地叫做「科幻作家」。炳叔話,佢地宜家死曬咯。

後尾呢,我追著問。

後尾我大個咗,我發現,唔係淨得我地中意開Party,國家都中意,成個人類都中意。佢地洗著人民繳交嘅稅金,佔用其他弱小民族國家嘅資源,開著無休無止嘅Party,甚至,會因為開派對打交,拉幫結派,爭奪開Ball地盤,就好似你地爭女仔咁。然後,派對開完,淨低成屋嘅破爛垃圾,成地嘅污糟邋遢,冇人清理,點算。佢地話,呢啲係留俾後代嘅遺產。「我屌佢老母」嘅遺產。

我第一次聽到炳叔講粗口,好誇張、好爆、好爽嘅感覺。我拍著手,要佢講多次。佢唔好意思咁笑笑口又講埋一次。

後尾,地球亂曬籠,大海嘯,大風暴,各種稀奇古怪嘅瘟疫,死淨啲人好似老鼠咁匿埋,今日不知明日事。The Party is over!派對玩完!

我老豆媽咪就係死於上一次流行瘟疫,我似乎有啲啲明白炳叔講嘅嘢。

炳叔放咗一條歌俾我聽,聲音好低,佢話係以前佢地開party果陣成日聽嘅,只不過我都覺唔到開心,我諗起老豆同媽咪,諗到個鼻酸酸地。佢見到我喺度揩眼角,摸下我嘅頭,話,酸橙嘅味道就好似你宜家咁,闔埋眼,想哭,又哭不出。

咁以後呢。

我都諗唔到。如果二○四二年嘅我會諗到今日呢個境況,或者會活出完全不同嘅人生。講開又講,如果每個人都想像到今日,或者世界都未必會係咁。

炳叔好似諗起啲嘢,佢望住我話,仲有三個禮拜就係你嘅成人禮,到時我們搞個Party啦不如?

好喔好喔。我要好似你地以前果樣嘅派對,通宵飲酒、唱歌、吹……吹乜來嘅?噢,吹水,周邊都係水,點吹啫。

我今年十三歲,即將成人,我從來未諗過今日之外嘅事情,但是從今日開始,我會開始想像,想像三個禮拜後炳叔同我開嘅派對。由今日起,好似本雜誌上寫著啲人果樣,我會望著看到聽朝嘅太陽,想像未來究竟會係點樣一回事。

(本文圖片為資料圖片)

陳楸帆簡介:科幻作家,編劇,翻譯,策展人。畢業於北京大學中文系與藝術學院,中國作協科幻文學委員會副主任、中國科普作協副理事長、九三學社社員,曾多次獲得全球華語科幻星雲獎、中國科幻銀河獎、世界奇幻科幻翻譯獎、亞洲週刊年度十大小說獎、茅盾新人獎等國內外獎項,作品被廣泛翻譯為二十多國語言,代表作包括《荒潮》、《人生算法》、《AI未來進行式》等。曾在Google、百度、諾亦騰等高科技企業從業,現為傳茂文化創始人。

上一篇

編後語:科學幻想無限與知音相顧

发表评论

您的电子邮件地址不会被公开。 必填项已用 * 标注

提示:点击验证后方可评论!

插入图片
返回顶部